28 C
Guwahati
Tuesday, July 27, 2021
  • जागायनाय
  • भिदिअ
  • टाइम कास्ट
More

    बिटिसि बिसायख’थि

    टाइम8बर’ देक्सनिफ्राय-

    हादराव क’रना जिउसानि गिख्रंथाव साग्लोबसारनायनि थाखाय थांनाय 4 एप्रिलाव खुंजानो गोनां बिटिसि बिसायख’थिखौ बिसायख’थि आयगा दोनथ’दों। हादराव कभिद-19 जिउसानि सनदेरनायनि थाखाय सोरखारनि हांख्रायनाय लेखा बे बिसायख’थिखौ बिसायख’थि आयगा दोनथ’नो गोनां जादों । बे दोनथ’नायनि थाखाय बिसायख’थि गेलेनाय बिजाथिफोरजों लोगोसे बिटिआरनि सुबुंफोरा जोबोर खस्थ’ मोनबाय । मानोना थांनाय मार्स दाननिफ्राय दिनैसिम बिटिसि बिसायख’थिनि मुङाव राजखान्थिनि हाब्रु साद्लानायनि जाहोनाव गाज्रि मोननायजों लोगोसेनो बिसायख’थिनि भटारफोरखौ थि खालामनो हायाखै। बिटिसि बिसायख’थिखौ दोनथ’नायनि जाहोनाव बिजेपि-बिपिएफ- एजिपि दोलोआ माबाफोर खैसाराव दं नामा, बेखौ लानानै खायसे सुबुंफोरखौ सावराज्लायनाय नुयो। रायजो बेंगिरिनि खुंथाया द’ दान जोबनायनि आगोलनो बिसायख’थि खुंनायनि राहाखौ लानो हायोमोन । नाथाय मन्थ्रि हिमन्त बिस्व शर्माआ फोरमायदों दि बिटिसि बिसायख’थिखौ फैगौ डिसेम्बर दानाव खुंगोन । नाथाय उदां बिसायख’थि आयगा मानो गनायथि होखो बे साननांगौ बाथ्रा। बिटिआर ओनसोलाव बिजेपि दोलोआ गावनि राजखान्थियारी मुलाम्फानि थाखाय बिसायख’थिखौ फावसायदों ना बिफिएफ दोलोआ फिन बिटिसिनि खुंथायखौ गावसोरनि आखायाव लांनो खैसार खालामदों बेबो सानथावना बाथ्रा। नाथाय थांनाय द’ दानाव क’रना जिउसानि गिख्रंथाव थासारि समावनो मिज’राम बादि हादरसायाव बिसायख’थि खुंफुंदों। आरो बे समावनो गाबोन बिहार रायजोनि बिधान सभा बिसायख’थिया खुंजागोन । बे बेलायाव आसामनि बिटिसि बिसायख’थिखौ खुङाबालानो बिटिसियाव रायजो बेंगिरिनि खुंथायखौ मानो फोलावखो बेबो सानथावना। बे दाइन दान बिटिसि बिसायख’थिनि मुङाव बिटिआरनि रायजो-राजाफोरनि गेजेराव भटखौ लानानै दाङा-बाजिया सोमजिगोन नामा ? बेबो साननांगौ बाथ्रा जादों । बे समाव एखे गामिनि रायजोफोरा गावजों-गाव मोनसा-मोनसिया जालायनाया बांद्राय जागोन नामा ? फैगौ डिसेम्बर दानाव खुंजानो गोनां बिटिसि बिसायख’थियाव माबे दोलोआ सोरखार दागोन बुंनाया गोरलै नङा। नाथाय रायजो-राजाफोरा मोनसे मिजिं खालामदोंदि जाय दोलोआनो बिटिसि सोरखार दायाथों मानो ओनसोलनि जौगानायखौसो लुबैयो। नुनायाव मोनफ्रोमबो दोलोनि बिसायख’थि फोसावदिं आफादाव रायजोफोरनि लोब-लोब बाहागो लानायाव बिजाथिफोरा आवबा जानायखौ नुदों।
    ओजों बावैसो सान सिगां कक्राझाराव आसाम रायजो बिजेपिनि आफादगिरि रन्जित कुमार दासा बुदों दि फैगौ सानफोराव 2 लाखनिफ्राय 2.50 लाख बर’ सुबुंफोरा बिजेपि दोलोयाव हाबहैगोन । बिदिनो कार्बि, दिमासा, मिसिं, सन’वाल कसारी, ठेङाल कसारी, तिवा,राभा, देवरी बायदि हारिफोराबो बिजेपिखौ बोजबनानै लादों । आरो बिदि हाबनायनि थाखाय रायजोनि बांसिन काउन्सिलफोरानो बिजेपि लोगोयारि दोलोजों खुंजानाय। बिथां बिजेपिनि आफादगिरिनि बुंनायनिफ्राय हमदांनो हायोदि बिजेपिया बिटिसिनि खुंथायखौ गावसोरनि आवथायाव लांनो सान्दों। बिनिखायनो फैगौ बिटिसि बिसायख’थियाव बिजेपि दोलोआ मोन 26+1 बियाबाव बिजाथि होदों आरो बि बिसायख’थियाव जेरैखि जाया बिजेपिनि बिजाथिफोरा देरहा लांनानै बिटिसि खुंथायखौ गावसोरनि फार्से लांनो नागिरनायनि इसारा बादि नुयो। नाथाय ओजों रायजो सोरखाराव बिजेपि-एजिपि आरो बिपिएफआ जयै लोगो जानानै सोरखार सालायनायाव माबा मोनसे जेथो नांनायखाय दिनै बिजेपि दोलोआ बिटिसिआव गाव हारसिंनो भट गेलेनो ओंखारनाया फिसा बाथ्रा जानानै थायाखै। दा इउ बि पि अ’नि माखासे दैदेनगिरि- सोद्रोमाफोरा बिजेपियाव हाबहैनायनि उनाव हाग्रामा महिलारीया बिटिसिनि बायजोनि बर’फोरखौ लानानै बिजेपि-कंग्रेस दोलोजों थुखे-थखा खालामनाय राजखान्थिखौ फोजोबस्रांनानै बिजेपिनिल’ खालामनो साननाय बादि आन्दास खालामनो हायो। आरो बिजेपि दोलोआ बिटिआराव बिपिएफ दोलोनि सिंखौ सेफायनानै गावसोर बिटिसिनि खुंथायखौ लानो साननाय बादि खैसार खालामनानै बिटिसि बिसायख’थिखौ फावसायदों नामा ? मिज’राम आरो बिहार रायजोफोराव क’रनानि प्रट’कलखौ सोरखारा मानि होनानै बिसायख’थि खुंनायबादि बिटिसि बिसायख’थिखौ डिसेम्बरनि आवगाय खुंफुंनो हागौमोन। दा जिखिजाया मानो फैगौ डिसेम्बर दानाव बिटिसि बिसायख’थिया मोजाङै-मोजां खुंफुं जाथों आरो गोदान सोरखारा ओनसोलनि रायजोफोरनि जौगानाय खामानि मावथों बेखौ मिजिंगथिबाय।

    Published:

    Follow TIME8.IN on TWITTER, INSTAGRAM, FACEBOOK and on YOUTUBE to stay in the know with what’s happening in the world around you – in real time

    First published

    ट्रेन्दिं

    इन्जुर बारनानै खारो हौवा गोदान-हिन्जाव गोदान, उन उन होसोलाङो पुलिस

    जाथायखौ फोरमायनायबादिब्ला, हाबाथिलिआव गनायथि होनायनिखुरै 10 जौखोन्दो बांसिन सुबुंफोर दंमोन।

    एनएलएफबिनि गाहाइ एम बाथाजों लोगोसे गासै 60 सा एनएलएफबिनि सोद्रोमाफोरा हाग्रानिफ्राय ओंखारबोफिन्नायनि सायाव एम बाथानि अनजालि बिसिआ मा बुंखो ?

    बेबादिनो 6 दानसोनि उनाव फिन हाग्रानिफ्राय सोराङाव गिदिंबोफिन्नायखौ खौरां मोन्नानै बिनि बिसिया गोजोन्नाय मोनदों आरो बरायदों।

    चिरांआव सासे लाइमोन सेंग्रानि गोथै देहा मोन्दों

    मिथिनो मोन्नाय बायदिब्ला, जीउ गोयै लाइमोननि देहाखौ निखिल महानायकनि फिसाज्ला ख्रिस्ण महानायक (33) होन्ना सिनायनो हायो।

    एनएलएफबिनि दाबिखौ मावफुंङाब्ला एनएलएफबिआ आखाय दैखांनाय नङा : एम बाथा

    दिनै आसामनि गिबि मन्थ्रिआ एनएलएफबिनि गाहाइ दैदेनगिरि एम बाथाजों लोगोसे दैदेनगिरिफोरखौ आसाम बिधान सभानि सावराय नब्लांआव सावरायलायनो लेंहरनाय लेखा एम बाथाया आगान होफैयो।

    बरपेटाआव हाग्रानि दावनि थैग्लुंनाय! गोजौ थाखोनि नायबिजोरनो बिथोन होनायजों लोगोसे सासे हमदों

    गासै मा 300 निबो गोबां दावथु, दावसेन आरो सिलाफोरा थैग्लुंदों बरपेटाआव।

    कक्राझारआव सासे बर’आइजोआ आखायनि हाबा मावना गोग्गानाय लाबोदों

    आयजोफोराबो सोलोंथाइजों लोगोसे गेलेमु आरो गुबुन गुबुन हाबा हुखायाव हौवा माहारिजों समान जायगा आवग्रिनो हादों।

    एनएलएफबिनि चिफ एम बाथाया हाथियार नागारनानै सोरखारजों गोजोन सावरायनो ओंखारबोनायखौ दुंब्रुयै बरायदों: बि.सावरायग्रा

    आरो एन एल एफ बिनि चिफ एम बाथाया गुदु हाग्रानिफ्राय मैया गिदिंना फिन बिटिआर ओन्सोलाव गोजोन खौसेथिनि थाखाय फैफिन्नायखौ दुंब्रुयै बरायदों बि.सावरायग्राया।