17 C
Guwahati
Friday, December 4, 2020
  • जागायनाय
  • भिदिअ
  • टाइम कास्ट
More

    बिजेपि दोलोआ समखिखांदों मानो ?

    टाइम8बर’ देक्सनिफ्राय-

    आसामाव साननैसो सिगां गिदिर फिसायैनो गोदानै मोनथाम राजखान्थि दोलोनि जोनोम जाबाय। बे दोलोफोरा जाबाय आसु आरो आसाम जातीयताबादी जुब’ सात्र परिषदनि ” असम जातीय परिषद”, असम कृषक मुक्ति संग्राम समिटिनि ” रायजर दल” आरो सिसिटिअ’नि ” आसाम भुमिपुत्र मन्स ” । 2021 मायथायाव जानो गोनां बिधान सभा बियाबनि बिसायख’थिनि सिगां-सिगांनो आसामनि गोबां राजखान्थि दोलोफोरा बिसायख’थिनि दावहायाव ओंखारनो जानजि खाफ्रानायखौ नुनो मोननाय जादों। बे बेलायाव कंग्रेस आरो ए आइ इउ डि एफ मोननैबो राजखान्थि दोलोआ ज’ जाबाय। “का” हेंथा सोमावसारनाय समाव कंग्रेस आरो ए आइ इउ डि एफ राजखान्थि दोलोजों लोगोसे आसामनि गोबां समाजारि आफादाफोराबो दंमोन। दा “का” नि हेंथायै फिन सोमावसारगोनखौ हुमखि होनाय नुदों समाजारी आफादफोरनिफ्राय। बे बेलायाव कंग्रेस- ए आइ इउ डि एफनि गेजेराव जानाय लोगोनि बाथ्राया थार जानो थांनायखौ नुनो मोनगासिनो दं। गोबां मेल- मिथिंफोराव बिजेपि दोलोनि माखासे दैदेनगिरिफोरा बि लोगो जानायनि सायाव एदावनाय रावफोर बाहायनाय नुनो मोनदों। बे बेलायाव बिजेपिनि दैदेनगिरिफोरा मिथिनाया मोजांदि सुबुंखान्थि हादराव गासैबो दोलोआ समान मोनथाय दं । बे समाव कंग्रेस आरो ए आइ इउ डि एफ राजखान्थि दोलोआ लोगो जानायाव एदावनाय रावफोर बुंनो बिसोरखौ रावबो मोनथाय होयाखै होन्नानै खायसे सुबुंफोरखौ बुंनाय खोनायो । फोरमायनो नांगोन सन’वाल सोरखारा दैबानानि जेंना, बेकारफोरनो साख्रि होनायनि जेंना, अभैध’ कयला, सुपारि, मोसौ धोननि गेट आरो लामा-सामा बायदिनि जौगानायनि बेलायाव जेसेबां जौगानांगौमोन, बिदि जौगानाय नुनो मोनाखै। बेफोर जेंनाया आसामनि गोबाव बोसोरनि जेंना । नाथाय बेखौ सुफुंनायनि सायाव बिजेपि सोरखारखौ बारा गोसो होयैखौ नुनानै खायसे दोलोफोरखौ धर्ना होनाय नुयो। लोगोसे राजखान्थियारि जेंनाया दंबावो । बेफोरनि माखासे जेंनाफोरा सुफुं जायैनि थाखाय दिनै आसामाव मैखोम गौथुमफोरनिफ्राय मोनथाम राजखान्थि दोलो जोनोम जानायाव एसे साननांगौ जानानै फैदों बिजेपि दोलोआ। बिनिखायनो साननो हायो दि 2021 मायथायनि बिधान सभा बिसायख’थिखौ नायोब्ला बिजेपि आरो बिनि लोगो दोलोफोरा रायजोनि मदद मोनगोनखौ गोजान नुयो। आसामनि रायजोफोरा बिजेपि दोलोखौ फिन सोरखार दानो होगोनखौ गोजान नुहुरदों। गोदानै दाजानाय असम जातीय परिषद राजखान्थि दोलोआ आसामनि रायजोफोरनि गेजेराव मुंदांखा जाबोगासिनो दं । जुदि असम जातीय परिषदनि दैदेनगिरिफोरा रायजर दल राजखान्थि दोलोजों लोगो जायो, अब्ला 2021 मायथायाव जानो गोनां बिधान सभा बिसायख’थियाव ओनसोलारि राजखान्थि गोहोफोरा गोख्रों जागोन। लोगोसे बावैसो सिसिटिअ’जों दाजानाय आसाम भुमिपुत्र मन्सआबो गोख्रों जाबावोब्ला फैगोन बिधान सभा बिसायख’थियाव ट्राइबेल गौथुमफोराबो गोख्रों जागोन। नाथाय बावैसो बिटिआरनि बायजोनि बर’ सुबुंफोरा थामहिनबा इउ बि पि अ’नि माखासे दैदेनगिरि-मावथिफोरा बिजेपि दोलोयाव हाबहैनायाव बिजेपि दोलोआ मुलाम्फा जागोन ना जाया बेबो साननांगौ बाथ्रा जानानै फैदों। नाथाय फैगौ डिसेम्बर दानाव जानो गोनां बिटिसि बिसायख’थिनि थाखाय बिजेपि राजखान्थि दोलोआ गाव हारसिं बिजाथि होनानै गेलेनायनि दायावबो बिपिएफ दोलोआबो जोंहाबनानै दं । बे बिजेपि दोलोआ बिटिसि बिसायख’थियाव गोबां बिजाथि देरहानानै बिटिसिनि खुंथायाव थाफादेरनो हागोनना हाया एसे सन्देह नुहुरो। मानोना फैगौ डिसेम्बर दानाव खुंजानो गोनां बिटिसि बिसायख’थियाव बि पि एफ दोलोआ मोन 37 बियाबाव, इउ पि पि एल दोलोया मोन 40 बियाबाव, बिजेपि दोलोआ मोन 26+1 बियाबाव, जिएसपि राजखान्थि दोलोआ मोन 40 बियाबाव आरो कंग्रेस- ए आइ इउ डि एफ दोलोआ मोन 16 बियाबाव बिजाथि फसंदों। बेखौ नायोब्ला बे बिटिसि बिसायख’थिया बिजेपि दोलोनि थाखाय मोनसे गिदिर आनजाद। बे आनजादाव उथ्रिनो हागोनना हाया बेखौ समा दिन्थिगोन । बिनिखायनो फैगौ डिसेम्बर दानाव खुंजानो गोनां बिटिसि बिसायख’थियाव जेरैखि जाया मोन 14 निफ्राय 16 बिजाथि देरहानानै बिटिसिनि खुंथायाव हाबनायनि थांखिखौ नायोब्ला बिटिआर ओनसोलाव बिजेपि दोलोनि मददगिरिफोरा खम नङा। ओजों हाग्रामा महिलारीया दैदेननाय बिपिएफ दोलोआबो मोन 30 निफ्राय 35 बियाबाव देरहानायनि मिजिंग आरो प्रमद बर’आ दैदेननाय इउ पि पि एल दोलोनिफ्राय मोन 25 निफ्राय 30 बियाबाव देरहाथारगोन होननानै रोखा जानायनि अनगायैबो जिएसपि दोलोया गोबां बियाबाव देरहानानै बिटिसिनि खुंथायखौ आवग्रिगोन बुंगासिनो दं । बिदि रोखा बुंलायनाय राजखान्थिनि सानखान्थियाव बिजेपि दोलोखौ एसे साननांगौ खालाम होनाया नंखाय नङा । नाथाय बे थिगदि बिटिसिनि अनगायै गुबुन अट’नमास काउन्सिलफोर दानायनि बेलायाव बिजेपि दोलोआ थाफादेरनायखौ नायोब्ला बिटिसिनि खुंथायखौ आवग्रिनानै लानाया एबा जा दोलोआनो सोरखार दायाथों मानो बि दोलोखौ लाफा होथारनानै लोगो जाफानाया बारा गिदिर बाथ्रा नङा। जुदि बिटिसिनि खुंथायाव थाफानो एबा खुंनो हायोब्ला फैगौ 2021 मायथायनि बिधान सभा बिसायख’थियाव देरहानानै सोरखार दाफिनगोना रोखासै बुंनो हायो। नाथाय बे एसे गोरलै सानखान्थि जानानै गैया। बिनिखायनो जेरैखि जाया बिटिसिनि खुंथायखौ बिजेपि दोलोआ लानो नारा-नाथा जुजिदों।

    Published:

    Follow TIME8.IN on TWITTER, INSTAGRAM, FACEBOOK and on YOUTUBE to stay in the know with what’s happening in the world around you – in real time

    First published

    ट्रेन्दिं

    प्रमद बर’आ ट्रेक्टर कम्पानिनि एजेन्ट : चन्दन ब्रह्म

    बिटिसि बिसाइख'थिनि मुङाव रां लानानै ट्रेक्टरनि इडभारटाइजसो खालामबाय थादों

    गावबुरानि गोसो थोनायाव बोदोर जानानै खारस’न फैदों सासे सिख्ला

    रुपहि कलेजनि फरायसुलिआ थांनाय 3 बोसोरनिफ्राय धिं जेङनिनि गावबुरा इक्रामुल हुसेइनजों मोजां मोनलायबोदोंमोन

    बिसायख’थियाव मोन 30 नि बारा एडिसनेल फर्स बाहायगोन: बि जे महन्त

    जायफोरा बिसायख'थि समाव हिंसायारी जाथाइ सोमजि होगोन बिथांमोनखौ गोख्रों साजा होनाय जागोन आरो बिसायख'थियाव मोन 30 निबो गोबांसिन एडिसनेल फर्स बाहायगोन होन्नानै महन्तआ बुङो ।

    रुंसारि देंखोगिरि वाजिड खाननि बिसिखौ नारसिननानै धोरोमखौ सोलाय होदोंमोन

    हादोराव कर'ना जिउसानि साग्लोबसारनाय समावनो मुंदांखा देंखोगिरि वाजिड खानआ रुंसारि जादोंमोन

    बे बाराव कर’ना नङा न’र’ भाइरासआ साग्लोबदों माखासे खुदियाफोरनि देहायाव

    बुहुमआव बोसोरै खमैबो 685 सुबुंनि देहायाव न'र' भाइरासजों गाग्लोबजायो