आबादारिनि सोमावसारनाय मोनसे नोजोर

टाइम8बर’ देस्कनिफ्राय-

जोंनि हादराव आबादारिनि सोमावसारनाया गोख्रोंसिन जानायाव हादरनाङैनो सोमावग्लुंदों। बेखौ आबादारिफोरा दिन्थिनो हाबाय बिसोरनि गोहोखौ। थांनाय सप्ताहसे गोजो हादरनि राजथावनि दिल्लीयाव आबादारिफोरा लानथ्रियै सोमावसारनायाव दुंहाव थासारि जादों। रायजोनि गोबां रायजोफोरनिफ्राय गोबां आबादारिफोरखौ दिल्लीयाव फैनो हायैनि थाखाय खुंथाया नारा-नाथा नाजादोंमोनब्लाबो सोमावसारनायाव खर’ गंग्लायनो गोनां जादों। गोबां रायजोनिफ्राय फैनाय आबादारिफोरा दिल्लीसिम सहैयाखै। माखासे रायजोयाव दिल्लीनि आबादारि सोमावसारनायाव बयबो बाहागो लानाया बाखनायथाव। दा बे सोमावसारनाया बारानिफ्राय बारा जानायाव सोरखारा आबादारिफोरजों सावरायनाया जाफुङोना जाफुङा बे एसे गिदिर बाथ्रा नङा। नाथाय सोरखारा आबादारिखौ मान होनानै सावरायनो नागिरनायासो गिदिर बाथ्रा जानानै फैदों। जों खौरां बिजोङाव मिथिनाय बादिब्ला खुंथायगिरिफोरा बे सोमावसारग्रा आबादारिफोरखौ माब्लाबा उग्रपन्थि, माब्लाबा कंग्रेसि आरो माब्लाबा पान्जाबि होननानै बुंनानै आयदाखौ गुबुन फार्से लांनो नागिरदोंमोनब्लाबो जोबनायाव जेंनाया गोथौसिन जालांनानै गोसोयाव नांहैबाय। आबादारिफोरजों गिबि खेबाव सावरायदोंमोनब्लाबो जेबो सुफुंनायनि लामा ओंखाराखिसैब्लाबो नाथाय दाबो सुफुं जागोन होननानै मिजिङाव दं आबादारिफोरा। बिसोर गोदान आबाद आयेनखौ बोखांगोन होननानै नेगासिनो दं। गिबियाव पान्जाब आरो हारियानानि आबादारिफोरा जागायजेनदोंमोन बे सोमावसारनायखौ। बिनि उनाव लासै-लासै हादरनि आबादारिफोरनि गेजेराव थाङो। बिदिनो उत्तर प्रदेश, राजस्थान, मध्यप्रदेश आरो महाराष्ट्रनिफ्राय रोजा-रोजा आबादारिफोरा फैनानै दिल्लीनि सिमना ओनसोलफोराव जमा जाफैदों । बाथ्राया जाबायदि आबादारिफोरा दासिम गोजोन आरो सुबुंखान्थि बादियै बिसोरनि दाबि-दावाफोरखौ सोरखारनि खाथियाव दैखांदों। आबादारि दैदेनगिरि आरो सरासनस्रा आबादारिफोरनि बिबुंथिनि गेजेरजों बे बाथ्राखौ हमनो हाबाय। दा सोरखारा गोदान आयेन मावफुङा बुंब्लानो जाबाय। अब्लानो आबादारिफोरा गोजोननो हागौ होननानै साननो हायो।