13 C
Guwahati
Monday, January 18, 2021
  • जागायनाय
  • भिदिअ
  • टाइम कास्ट
More

    बिटिसि बिसायख’थिआव देरहानो थाखाय प्रमद बर’आ जन’जाति नङै सुबुंफोरखौ गिनिपिक महरै बाहायदों: पृथ्वीराज नारायन देब मेस

    टाइम8, नबेम्बर 27:
    दिनै गुवाहाटीआव मोनसे खौरांगिरि मेल खुंनानै बारग’ एनडिएफबिनि दैदेनगिरि गबिन्द बसुमतारी, बि सानजारां आरो इउपिपिएल दोलोनि सायाव पृथ्वीराज नारायन देब मेसआ गोबां अजद दैखांदों । खौरांगिरि मेलाव बिथाङा बुङो दि बिटिसिआव 60% जन’जाति नङै सुबुंफोरा हानि मोन्थाइ खोमानो थांगासिनो दं। प्रमद बर’ दैदेननाय इउपिपिएल दोलोआ बिटिसिआव सोरखार दायोब्ला बिटिसिआव 60 जौखोन्दो जन’जाति नङै सुबुंफोरा हानि मोन्थाइ खोमागोन ।

    6 नबेम्बर 2014 माइथायाव दानि इउपिपिएलनि बिजाथि गबिन्द बसुमतारी आरो सन्जय सर्गियारी उरफे बि सानजारांआ गाहाइ मन्थ्रिनिसिम गांसे लाइजाम हरदोंमोन होननानै मेसआ बुङो। बे लाइजामाव लिरनाय दंमोन दि बिटिसि एबा ट्राइबेल बेल्ट एण्ड ब्लकआव 60 जौखोन्दो हायाव बेआयेनि भाबै जन’जाति नङै सुबुंफोरा जिउ खुंगासिनो दं । बे लाइजामनि फिननायाव 12 दिसेम्बर 2014 माइथायाव गाहाइ मन्थ्रिनि मावख’निफ्राय आसामनि सिफ सेक्रेटारिनिसिम बे बेआयेनि दखलनि सायाव राहा लानांगौ होननानै बिथोनलाइ फैदोंमोन।
    बेयावनो सिरि थायालासिनो, बि सानजारांआ फिन गाहाइ मन्थ्रिनिसिम बिटिसिआव ट्राइबेल बेल्ट एण्ड ब्लकआव जन’जाति नङै सुबुंफोर आरो मुसलिम सुबुंफोरा बेआयेनि हिसाबै दखल खालामना दं होननानै फोरमायना आरजलाइ हरफिनो होननानै फोरमायो। बे लाइजामावनो बे जन’जाति नङै आरो मुसलिम सुबुंफोरा आसाम आरो बर’फोरनि थाखाय मोनसे हुमकि ।

    बेनि उनाव फिन गाहाइ मन्थ्रिनि मावख’निफ्राय बे दखल खालामनायनि सायाव लानांगौ राहाखौ लानो थाखाय आसामनि चीफ सेक्रेटारिनिसिम बिथोनलाइ फैदोंमोन होननानैबो बुंथियो मेस बिथाङा।

    लोगोसे बुंबावो दि- बिटिसिआव इउपिपिएल दोलोआ सोरखार दायोब्ला जन’जाति नङै सुबुंफोरा हानि मोन्थाइ गोमागोन होननानै बुंथिनाया ओरैनो होननानै गोबाङानो बुंनो नाजादोंमोन नाथाय दिनै आं फोरमानजों नोंथांमोननि सिगाङाव बेखौ होबाय।

    इउपिपिएल दोलोआ सिगांनिफ्रायनो जन’जाति नङै सुबुंफोरखौ बिटिसिनिफ्राय बोखारनो थाखाय बे खैसारखौ खालामनानै दोनदों होन्नानै अजद दैखाङो मेस बिथाङा। जन’जाति नङै सुबुंफोरा जुदि बे खेबाव इउपिपिएल दोलोखौ भट होनानै देरहा होयो अब्ला गावब- गावनि हाखौ खोमानो थाखाय थियारि जानानै था मानोना बिटिसिनि हायाव थानाय जन’जाति नङै सुबुंफोरखौ बोखारनो थाखाय गाहाइ मन्थ्रिनि मावख’निफ्राय बिथोनलाइ होनाय दंखायो होननानै दाबि खालामो मेस बिथाङा।

    बे मेम’रेन्दामखौ एनडिएफबिनि जानानैसो गबिन्द बसुमतारी आरो बि सानजारांआ होदोंमोन बेयाव इउपिपिएलनि माबोरै खैसार थानो हायो होननानै खौरांगिरिनि सोंथिआव देब मेसआ बुंथियो दि इउपिपिएलनि आफादगिरि प्रमद बर’नि बिसायख’थिआव गेलेनायनि गुबै एजेन्दायानो जादों बिटिआर गोरोबथा। आरो बे गोरोबथायावनो 7.2 नं दफायाव लिरनाय दं दि बिटिआरआव बेआयेनि दखलफोरखौ बोखारनाय जागोन । बेनिखायनो इउपिपिएलआ सिगांनिफ्रायनो बे खैसारखौ खालामनानै दोनखादोंमोन। बिटिसि बिसायख’थिआव देरहानो थाखाय प्रमद बर’आ जन’जाति नङै सुबुंफोरखौ गिनिपिक महरै बाहायदों होननाबो दाबि खालामो देब मेसआ।

    बिपिएफ सोरखारा मानो आसाम सेक्रेटारीयेटनिफ्राय जन’जाति नङै सुबुंफोरखौ बिटिसिनिफ्राय बोखारनायनि बिथोन होनायनि उनावबो मानो बोखाराखै बेनि फिननायखौ बिपिएफआसो होनो हागोन होनना खौरांगिरिनि सोंथिआव फिननाय होयो। नाथाय प्रमद बर’ दैदेननाय इउपिपिएलनि सोरखार फैयोब्ला जन’जाति नङै सुबुंफोरखौ होखारगोन बेयो रोखा मानोना बिसोरखौ बोखारनांगौ होननानै बिटिसिसिम गाहाइ मन्थ्रिनिफ्राय बिथोनलाइ फैनानै दं होननाबो मेसआ बुङो।

    इउपिपिएल आरो बिजेपिनि गेजेराव मोन 9 मासिनि गोरोबथा जादों होननानै सोंथि खालामनायनि फिननायाव मेसआ बुङो दि- हिमन्त बिस्व शर्माया बे दखल खालामनायनि बागै मिथियो बेनिखायनो बिजेपिआ बिटिसिआव गोख्रोङै बाहागो लादों। मानोना बिथाङा मिथियो दि इउपिपिएलआ सोरखाराव फैयोब्ला जन’जाति नङै सुबुंफोरा गावनि हानि मोन्थाय गोमानो नांगोन ।

    Published:

    Follow TIME8.IN on TWITTER, INSTAGRAM, FACEBOOK and on YOUTUBE to stay in the know with what’s happening in the world around you – in real time

    First published

    ट्रेन्दिं