टाइम8, दिसेम्बर 03
खम समनि गेजेरावनो फावखुंग्रि गौहर खानआ जुलि जासिगोन। गावनि मोजां मोननाय 12 बोसोर दुइसिन अनजालु जैद दरबारजों लोगोसे जुलिनि गोरा बान्दोखौ खासिगोन।
मिथिनो मोननाय बादिब्ला फावखुंग्रिनि जुलिया बोहैथि दाननि 25 दिसेम्बर अदेबानि ख्रिष्टमास सानखालि जागोन। बे खौरांखौ गौहर खानआ गावनि इन्सटेग्राम पष्टनि गेजेरजों फोरमायदों।
बेनि गेजेरावनो फावखुंग्रि आरो बिनि अनजालुनि बैसोनि फाराथिखौ लानानै ससियेल मेडियायाव गोबां सावरायनायखौ नुनो मोनदों। बेखौ नुनानै फावखुंग्रि गौहर खानआ बिसोरनि बैसो फारागथिखौ लानानै ससियेल मेडियायाव बेफोरबादि सावरायलयनायनिफ्राय गोजानाव थानो खावलायदों।
बेजों लोगोसे फावखुंग्रिया ससियेल मेडियानि गेजेरजों बुंदों दि, जों सानैनि बैसोनि फारागथिया 10 बोसोर नङा 12 बोसोर। आरो मोजां मोनलायनायाव बैसोनि जेबो फारागथि थाया।