27 C
Guwahati
Wednesday, December 1, 2021
More

    उफ्रा बिसायख’थिनि खरसा !

    उफ्रा बिसायख’थिनि खरसा !

    टाइम8बर’ देस्कनिफ्राय-

    फैगौ 30 अक्टबर खालि आसामनि मोनबा बियाबाव उफ्रा बिसायख’थिखौ खुंनो लानाय जादों। बिफोर बियाबफोरनि मोननै बियाबनिफ्राय सायख’जानाय एमएलए सानैआ हरखाब जिउ गोमानायनि थाखाय फिन बिसायख’थिखौ खुंनो गोनां जादों, बे थार बाथ्रा । नाथाय गुबुन मोनथाम बियाबाव बिनि एमएलएफोरा गावारि सार्थ’खौ सुफुंनो दोलो सोलायनाय खामानियाव गोजोमनायनि थाखायनो फिन बिसायख’थिखौ खुंफिननो गोनां जादों। बे उफ्रा बिसायख’थिनि देरहानाय-जेननायखौ लानानै दा समाव खुंथायाव थानाय सोरखारनि राजखान्थियारि बिथिङाव दाजाब-दानख’याव जेबो गोहोम गोग्लैगोनखौ नुनो मोना। नाथाय 2024 मायथायाव खुंजानो गोनां लक’ सभानि बिसायख’थिखौसो नोजोर होनानै बेरेखा दोलोआ बिसोरनि जौखोनायनि सायाव माबा गाज्रि गोहोम गोग्लैगोन नामा होननानैसो एसे सांग्रां जानायखौ नुनो मोनो। दा खायसे दैदेनगिरिफोरा गावनि दोलोखौ गारनानै उफ्रा बिसायख’थियाव ओंखारनायनि गासै खरसाफोरखौ बिसोरखौनो खरसा खालाम होनांगौ होननानै दिनै साननो गोनां खालामदों। मानोना बे कर’नानि गिख्रंथाव थासारियाव हादरसायाव गासै बिथिंजोंबो दावराव-दावसि जादों। फरायसा-फरायसुलिफोरनि फरायसालिफोरा बन्द, बेफार-फालांगिफोरा बन्द, फिसा-फिसौ साख्रि मावगिरिफोरनि साख्रिया बन्द जादों।

    👉टाइम8बर’ इयुटुब सेनेलखौ नायनो थाखाय बेवहाय थुनानै हो-https://www.youtube.com/c/TIME8Bodo

    बिदि थासारियाव उफ्रा बिसायख’थि खुंनायाव बेसे बानबुंथि दं ? बिजाथिफोरजों लोगोसे राजखान्थि दोलोफोरा गावारि सार्थ’नि थाखाय जेरैबो नाजाथाबगोन। बे थार बाथ्रा । नाथाय आसामाव बिसायख’थि खुंजानाया बारा गोबां दान थाङाखै। जुदि दोलोखौनो सोलाय लायोब्ला बिसायख’थिनि आवगायनो सोलायनो हागौमोन ! बिसायख’थि खुंनानै देरहाखांनानै एमएलए जानायनि उनाव फिन मानो ? रायजो बाख्रिनिफ्राय एसे गोबां रांफोर खरसा खालामनायनि थाखाय दैदेनगिरिफोरानो दायनिगिरि नङा ना ? बे समाव दैदेनगिरिफोरा बानबुंथि होदोंदि खुंथाय दोलोआव थायाब्ला बियाबखौ जौगानाय लाबोनो हाया। दा जों नुबोनाय बादियै थावरा बियाबाव थांनाय बा बोसोरानो खुंथायाव थानाय एमएलएनि आखायावनो दंमोन। अब्ला बियाबा जौगायैनि दाया सोरनि ? बिदि बुंनाय रावा जेबो ओंथि गैया होननानै बुंनांगोन। थारैनो बिसोरबादि दैदेनगिरिफोरा बिसायख’थियाव गोबां बिबांनि रां-रुफा खरसा खालामो। खुंथाय दोलोआव थायाब्ला एसे बुरजा रां-रुफाफोरखौ मोनफिननायनि सुबिदा थाया बादि नुहुरो। बिनिखायनो दोलो सोलायनानै खुंथायाव थानाय दोलोनि सोद्रोमा जानो नागिरो। बिदि थासारिनि थाखाय भटारफोरा सांग्रां जानो गोनां जानानै फैदों। दोलो सोलायग्रा दैदेनगिरिफोरा जाहाथे सुबुं थान्दै जानो हाया, बिनि थाखाय नोजोर होनांगोन भटारफोरासो। दा बिनिखायनो सोरखारा बिदि रोखोमनि नेमखान्थिफोर लाबोनांगौदि जाहाथे गावारि सार्थ’नि थाखाय दोलो सोलायनानै उफ्रा बिसायख’थि खुंनो थांनायाव गासै खरसाफोरखौ बिदि रोखोमनि दैदेनगिरिफोरनिफ्राय आदाय खालामनानै लानांगौ! अब्ला एमएलए जाखानाय सुबुंफोरा दोलो सोलायनायनि मुङाव बिदि आखु खालामनाया बन्द जागोन होननानै साननो हायो।

    टाइम8बर’आव बायदि फोसावनो लुबैयोब्ला बे जानबुङाव खौरां लानो हागोन । सुलाद लानायनि जानबुं: 8404085908

    आरो फरायबाव : तामुलपुर दख’रा दुलाराइ बर’फरायसा आफादनि सनाथि माइथाय फोर्बोखौ खुंफुंनो बानजाय आफादनि मावखुलि लाबाय

    Published:

    Follow TIME8.IN on TWITTER, INSTAGRAM, FACEBOOK and on YOUTUBE to stay in the know with what’s happening in the world around you – in real time

    First published

    ट्रेन्दिं