13 C
Guwahati
Monday, January 18, 2021
  • जागायनाय
  • भिदिअ
  • टाइम कास्ट
More

    बिटिसि खुंथाया सोरनि आखायाव फैगोन ?

    टाइम8बर’ देस्कनिफ्राय

    बे दाननि 7 आरो 10 खालाराव 4थि बिटिसि बिसायख’थिया खुंजागोन । बेखौ लानानै दा बिटिआर ओनसोलनि माखासे सांग्रां नोगोरारिफोरनि गोसोयाव मोनसेल’ सोंलु दि डिसेम्बर 12 खालार खालिनि बिसायख’थिनि फिथायखौ फोसावनायनि उनाव सोर बिटिसि खुंथायखौ आवग्रिनानै लागोन ? दा सान्दै बिटिसि बिसायख’थिनि थाखाय बिपिएफ दोलोआ मोन 37, इउ पि पि एल दोलोआ मोन 40, जिएसपि दोलोआ मोन 40, कंग्रेस + एआइइउडिएफ दोलोआ मोन 16 आरो बिजेपि दोलोआ मोन 26 बियाबाव गावबा-गावनि बिजाथिफोरखौ फसंदों। नाथाय खायसे बिजाथिफोरा गावनि दोलोजों बिसायख’थियाव बिजाथि होजायैयाव उदां बिजाथि महरैबो बिसायख’थि गेलेनो ओंखारनाय नुनाय जायो। बे माखासे उदां बिजाथिफोरखौ बिजेपिया मदद होनानै जेरैखि-जाया बिटिसि खुंथायखौ लानो सानदों । बे बेलायाव जुदि बिजेपि दोलोआ बिटिसिनि खुंथायखौ आखायाव लाबोनो हायोबा बर’ सुबुंनिफ्राय गाहाइ सोद्रोमाखौ सायख’नायजों लोगोसे लेङाइ गाहाइ सोद्रोमाखौ बर’ नङै सुबुंखौ सायख’गोन होनदों। बेखौ नायोब्ला बे खेबाव बिजेपि दोलोआ जेरैखि-जाया बिटिसिनि खुंथायखौ आखायाव लाबोमारगोन नामा ? बेबो साननांगौ बाथ्रा जानानै फैदों। ओजों नाथाय कक्राझार लक सभानि एमपि नब’ कुमार सरनीया दैदेननाय जिएसपिनि बागसा जिल्लानि मथनगुरी बियाबनि बिजाथि इब्राहिम आलिया हरखाब बिपिएफ दोलोयाव हाबहैनाया जिएसपि दोलोआ बिटिसि बिसायख’थियाव देरहानानै सोरखार दानो हायैखौ सन्देह जानानैनो बिपिएफ दोलोआव हाबहैबाय नामा ? बिटिआराव जोबनायनि लामायाव फैबाय नामा अनाबर’नि राजखान्थिआ ! बिसायख’थिनि आगोल जिएसपि दोलोनि मथनगुरी बियाबनि बिजाथि इब्राहिम आलिआ बिपिएफ दोलोयाव हाबहैनायाव जिएसपिनि दैदेनगिरि-मावथिफोरा दुखु मोननानै कंग्रेस- एआइइउडिएफ दोलोआव हाबहैदों। बिनिफ्राय फोरमान जाबायदि अनाबर’ गोसो लानानै दानाय जिएसपि दोलोआ थेरबेथेर जानायनि लामायाव फैबाय। नाथाय बिपिएफनि बारग’ गाहाइ नेहाथारी थामहिनबा तामुलपुर बिधान सभा बियाबनि एम एल ए इमानुवेल मोसाहारी आरो राज्य’ सभानि बारग’ एमपि बिस्वजित दैमारीमोनखौ बिजेपियाव हाबहोनानै बिटिसिनि खुंथायखौ बिजेपिया दखल खालामनो नाजानायखौ रावबो नङा बुंनो हाया। बिदियैनो बिजेपि दोलोआ बिटिसि बिसायख’थियाव उदां बिजाथि महरै गेलेनाय सा 14 बिजाथिफोरखौ मदद खालामनायाव रोखा जाबायदि बे खेबाव बिजेपि दोलोआ जेरैखि-जाया बिटिसिनि खुंथायखौ लाथारगोन। नाथाय हाग्रामा महिलारी दैदेननाय बिपिएफ दोलोआबो ओरैनो जिरायनानै थायाखै। बिसोरनि दैदेनगिरि-मावथिफोरा गोदान-गोदान आदब-सोलो बाहायनानै भटारफोरनि भटखौ मोननो हास्थायदों। बे बेलायाव कक्राझार लक सभानि एमपि नब’ कुमार सरनीयाआ दैदेननाय जिएसपि दोलोआबो अनाबर’नि भट मोननो बिपिएफ, बिजेपि आरो इउ पि पि एल दोलोनि बायदिसिना अजद दैखांदों। नाथाय बिसोर बर’नि गामिफोराव जेबो गोहोम गोग्लैहोनो हायाखै । बेरा फार्से प्रमद बर’आ दैदेननाय इउ पि पि एल दोलोआ बिटिआरनि मोनफ्रोमबो हारि-माहारिनि गामि आरो नखर-नखर थांनानै बिटिसियाव सोलायनायनि दोहौ लानानै बिसायख’थि फोसावदिंनाय नुनो मोनदों। बे बिथिङाव ससेल मिडियाआव जा बादि फोसाव जादों, बेखौ नायोब्ला फैगोन समाव बिटिसि खुंथायखौ इउ पि पि एल दोलोखौ आवग्रिगोन बादि सानजायो। बे बाथ्राया थिगदि बिटिसि एबा बिटिआर गोरोबथाखौ बर’फोरा एफा गोरलैयै मोनाखै । गोबां बर’ सेंग्रा-सिख्लाफोरनि जिउ गोमानाय, जेल जोबजानाय, बर’ आइजो माहारिया जिनाहारी खालामजाजा नांनायनि फिथाइ महरैसो मोननाय बे बिटिसि एबा बिटिआर गोरोबथाआ । बेखौ नायोब्ला हारिमायारि राजखान्थि दोलोफोरा बिटिसि बिसायख’थिखौ गेले फैनो नाङामोन होननानै बुंनो सान्दों बिटिआरनि माखासे सुबुंफोरा। नाथाय बिजेपि दोलोआ गुबुन ट्राइबेल अट’नमास काउन्सिलफोरखौ गावसोरनि आखायाव लांनाय बादि बिटिसिनि खुंथायखौबो जेरैखि-जाया गावसोरनि आखायाव लांनो नागिरनाया मोजां बाथ्रा नङा। जियानो जाया मानो फैगौ डिसेम्बर 7 आरो 10 खालाराव खुंजानो गोनां बिटिसि बिसायख’थिया गाहामै-गाहाम खुंजानानै मोनसे गोगगो सोरखार दाफुं जाथों बेखौ आसाथिबाय।

    Published:

    Follow TIME8.IN on TWITTER, INSTAGRAM, FACEBOOK and on YOUTUBE to stay in the know with what’s happening in the world around you – in real time

    First published

    ट्रेन्दिं