17 C
Guwahati
Friday, December 4, 2020
  • जागायनाय
  • भिदिअ
  • टाइम कास्ट
More

    जिजुलि

                                                                            लिरिगिरि – दाउफ्रि लाबारि                                             

            जुजाइनि दन्दराव खामखुमाबाय थानाय मिलौसे अरा बाहेराव सालाइ बारनबाय । बेयो सोरगिदिं गुदुं गोदौग्लाबनाय होफैबाय बां-मानसिफोरनो । हालाय हाफाय जादों ओंखायनो मानसिफोर । जाहोनाव बेनि मुङैनो मुख्लंबो जालांबाय आरोबाव गोदानै । आयखां-बायखाङै सानआ हरखौ नागिरो आरो हरा सानखौ नागिरो । सानसेबोसो गोजोननि बार बाररोङाखिसै बे समाव । सोरबाया रैखा मोननो थाखायनो मन्दिर, मज्जिद, गिर्जा, थानसालिफोराव इसोरखौ गाबज्रिहरबायदों । सोरबाया सान हर बैखौनो थाग्रा खुलिबो खालामनानै लादों । अथस सोरबाया इसोरनि फारसे मोखाङानो जायामोन । थेवबो ।

            बुंनो थाङोबोला बे खोथाया गोदानै सोरजिजानाय नङा । जाय समफोरखौ गोदानै गोसोखांहरोबोला थै रोदा-रोदा सौब्लाफैनायजों माखासे जारिमिनफोरा थाथिर हायै खालामो बर’फिसाफोरखौ । बेयो बां-बोसोर बारलांबाय, जायखौ मोननो हांखुरैनो सोरबाया ओंखाम रसा नांबोबाय, सोरबाया जिउजों जुजियै जुजियै जिउनि सानसुथिर समावनो सोरबाया गाव गावनि जिउखौनो बोलि होबोबाय । हयथ’ नोंथांनि मेगनाबो नंखायैनो मोदैनाय नङा । जायफोरा दिनैबो आयखां-बायखाङै फोजाफैयो उन्दुस्रिनानै थानाय बे हारिखौ । जाय जारिमिना रिमोनला उन्दुस्रिनाय नागारनायखौ लुबैदों ।

            15 बोसोरनि उनाव आं न’फारसे दिंग्रायलांफिननो ओंखारबाय । दा बोथोरा गुसु । बेयो आघोननि फुंबिलि । LIT-GHY EXPRESS ट्रेइनजोंनो आं थांनोखौ सानबाय । आंलाय सान्दोंमोन अख्रां जाहासजोंनो थांनोखौ, नाथाय जाहोन दङ बैजों थाङैनिबो । उन समफोराव खाबु मोनोब्ला फोरमायनोसै आं । बे समा आदोरमालिथार, ट्रेइन स्तेशनाव सहैथारगौनि । दायो आं आंनि थाफैनाय खथानिफ्राय दावथ्रोदहांबाय । नाथाय खथाखौ नागारनानै थांनोखौ मेंनाय मोनबायमोन आं । जेरावनाेखि आं 15 बोसोर जुगामियै थानो लाबायमोन । कम्पानीनि बिगोमायाबोसो हगारहरनो गोसो गैयैजोंनो मैया मोनाबिलियाव आंखौ लोगो हमफैनानै थरथिंसे मोदै गसरफैदोंमोन । आं बिनि बिखायाव एब्रेहैनानै नागारनानै थांनो हायैनि दुखु फोरमाय हैदोंमोन । अब्लानि समाव गोरायै गोबाथाबनानै लाबायमोन । दर्जायाव बिनिनो फिसाजो सन्द्रलिकानि गाबज्रिफैनायजों थक..थक.. बुफैनायावसो जों सानैजों गोबालायनायनिफ्राय जुदा जाबाय । सन्द्रलिकाया खथा सिङाव हाबफैनानै आंखौ थांखिनानै बुंदोंमोन- हजों नोंसोरनि आसामाव दावराव दावसियानो दासिमबो गोरोबलायाखैब्ला थाङाब्लाबो जासिगौमोन गेदेर… उनफोराव थांनो हागौमोन । बिनि खोथायाव आं बुंफिन्दोंमोन- बिदियैनोथ’ 15 बोसोर जाफैबाय लिका…. आरोलाय गिनानै समखौलाय बेसेथो आद्रि खालामबावनो । जोंनि खोथानि फारि हमनानैनो बिफायाबो बुंफादेरो- आरो ट्रेइनजोंसो थांबावगोन…सान्थाम जोग्गो लाखायो….।

            फुंबिलियावनो सन्द्रलिकाया गावनि Car खौ बरननानै गेट मोखाङावनो दोम लाखिथ’बाय । आंलाय नुहुरनानै सान्दों बियो बहाबा बेरायगोन । नाथाय जेब्ला आं खथा नागारनानै गेटसिम सहैयो अब्ला बियो बुंदोंमोन आखाइनि बेगफोरखौ गारियाव थिखोदो गेदेर । स्तेशनसिम दोनहैनोखौ आफाया मैयानो थिनखादों आंखौ । हाबाब ! बिसोरदि बेसे अनो आंखौ । ना आंखौल’सो ? .. ना गुबुन खामानि मावग्राफोरखौबो ? … थाफैजेननायनिफ्रायनोबो आंखौ गुबुनफोरनिबादि खस्त’ खामानियावबो आखाइ होहोआखै । जाहोनाव आं नखरनिबादिसो मोन्दोंमोन बे दारिमिनखौ ।

            सन्द्रलिकाया गारिखौ सालायनो हमजेननायनिफ्रायनो गोबां बाथ्रा सावरायहोलांदों । सम सम आं गारिनिनो जानालानि आरसियाव गोजावफैनाय नुबिलिखौल’ नायगोमोनानै थाबाय थादोंमोनल’मोन । बिनि बुंनाय आरो आरासिनि नुबिलि बे मोननैखौ बबेबा रमान्सनि मांखरसालिबादिबो मोनलायलायदोंमोन । हयथ’ बे समा सोरबा खन्थाइगिरिनि जायोमोनबोला मालांखोआवनो खन्थाइ सुजुसिगौमोन । आं मिथिमोना खन्थाइगिरिफोरादि बबेनिफ्राय मा नुगोदान सोदोब बरननानै लाबोयो । आंहासो नुनानै देबोर नांलायो । जाहोनाव बेखायनोदि खन्थाइगिरिफोरखौ मोजां मोनो । जुदि बिसोरनि गेजेरनिफ्रायनो आंबो सासे खन्थाइगिरि जायोमोनबोला आं आंखौनो बै जोंबाय थानाय साननिख्रुयबो जौसिनै मोजां मोनगौमोन । हयथ’ बेखौ सोरबायाबो सुनायनानै बुंनोबो हानाय नङामोन । नाथाय आंदि नङा खन्थाइगिरि । खन्थाइनि गोदान सोदोबनि फामुआदि बहानिफ्राय नुजाफैयो बेखौबो आं मिथिया । एखनब्ला आं मिन्थिनो हांखुरैनो सन्द्रलिकानाव सोङो जेबोला बियो आंनो खन्थाइ फरायहोयो ।  अबोला बिबोसो मिनि मिनियैनो बुङोमोन- आंबो मिथिया दैमारि । लिरनो होननानै खोलोम दैहांबोलानो आं मिथिस्लाबाजासे बबेनिफ्रायबा फैयो । आं लिरनोबोल’ रोंगौ, नाथाय आंबो नङादे खन्थाइगिरि । लिकानि खोथाफोरखौ बिदै गोनां मोन्थोरो आंहा । बियोदि माबोरै साजायना बुङो आंहासो खोनासंनो खोनासंनोबोल’ जाबाय थायो । बेखायनो नंनायनि नङैनि बिजों बेरायफानाय हुदायाबो जेव-जेवथार आंहा । बियो गाबहोनानै दोननाय रेदिआ’ बादिल’ लं-लं फरायलांबाय थायो । बियो बांसिनै माराथि रावजों खन्थाइ लिरो। बेनि अनगा हिन्दी आरो इंराजिखौबो एसे एनै लिरो । आंहाथ’ माराथि रावनिखौ बुजिमोनखाला, अबोला बियो हिन्दीयै रावस्लायनानै फोरमायनोसैलाय । आं मिथिमोना बियोदि आंनो मानो खोनासंहोयो । ना साफ्रोम खन्थाइगिरिफोरानो बिदिथाय ? नंगौबो जानो हागौ । खायसेखौ आं मोनबोफेरदोंदि बबेबा खामानिखौ मावफुंनो हायोब्ला गुबुननोबो मोन्थिहोनो मोननानै जोबोरैनो गोजोननाय मोननायखौ । आंबोथ’ गामियाव थाबोला खम नङोमोन । सोनाबारि बिलोआव बाथा बोरसिजों ना बोनहैनानै सेरफागाहाम ना मोनबोला दाउखाफोरबादि गा-गा रोनावनानै खौरां बिलायनाया । गोसो खाङोब्ला मिनिफ्लां लायलाङो आंहा । बिब्दिबो जानो हागौ, ओंखायनो लिकाया आंबादि नंखाय खामानि मावग्रानोबो खोनासंहोबाय थायो । बांसिनै आं बिनि रमान्टिक खन्थाइ लिरनायफोरखौ खहाबसिननाय मोन्थारो । बियो बांसिनै रमान्टिक खन्थाइखौनो लिरो ।

            Lokmanya Tilak Terrminus स्तेशन । लिकाया गारिखौ दोम लाखिनानै आंनि गांसे बेगखौ लानानै लाखिनानै दोननाय ट्रेइनसिम आगान होयो । आंबो गांसे बेगखौ उन्थिंजाय बानानै बिनि उन उन थाबायफादों । ट्रेइनसिम सहैनानै ट्रेइननिनो सिङाव हाबनानै गोजौनि आथालाव बेगफोरखौ दिखोबाय आं । अबोला लिकाया बुंदोंमोन- “आं फैगासिनो ।” बियो बाहेराव ओंखारलांदोंमोन । आं आंनिनो जिरायग्रा सेरनिनो सोंथेनायखौ एसे बोफ्लोमनानै बाहेरनि नुथायफोरखौ नायहरो । बेथिंजाय आं दावबायारिफोरनि रै-फै होंगो-दोंगोफोरखौ नुहुरनो मोन्दोंमोन । गासिबोआनो दावबायारि नाथाय बेखौसो आं मिथियादि सोर बबेनि दावबायारि आरो बबेयाव दावबायगोन । आलांगा सम मोननानै आं बेगनिफ्राय इमरान हुसेइनआ सुजुनाय असमिया बिजाब “अस्तिर प्रान्तर”खौ दिहुननानै लाबाय । बिजाबखौ दिहुननानै जिरायनो लानाय समाव सन्द्रलिकाया दाब्बा सिङाव हाबबोदोंमोन । बियो आंनि सेरावनो फैनानै बेयो आंनिसो जायगा होननानै बुंदोंमोन । आं मिनिस्लुनानै बिखौ आं जिरायनाय मासियाव जिरायहोदोंमोन। आं बिनि सेरावनो जिरायफादोंमोन। सानैजों बां-खोथा रायज्लायखांनायनि उनाव ट्रेइन खारसिगोननि खेबसे खौरां फोसाव हरदोंमोन । आं बे खौरांखौ स्तेशनावनो आलायनानै दोननाय गाबदु (Speaker Box) निफ्राय खोनामोन्दोंमोन । अबोला आं लिकाखौ बुंदोंमोन- “ट्रेइनआ खारनायनि सम जाबाय, नों ओंखारदो लिका ।” बियो मिनिनानैल’ थादोंमोन । आं बुजिस’नो हायाखैमोन बियोदि खोनासेयावबो मानो ओंखाराखैमोन आरो मिनिनानैबोल’ स्रि थाफिननायखौ । फिन मोदोमाव बुज्रांलायनानै बुंगारबाय आं-

            : ओइ लिका, मानोथो ओंखाराखिसैबो…., ट्रेइनआ खारब्ला ओंखारनो हाख’नाय नङा ।

            : गाहामसोदा….

            : गाहाम माने ?…

            : आं नोंनि जिजुलिसो, मिथिबाय….। अननाइजोंनो गन्थङाव खेबसे हमनानै बोगासे बोनानैसो बुंबावलायबाय बियो । बिनि खोथायाव मिनिगोनसोना मागोनसो जालायलायबाय आं । बिखौ दसे उनाव ओंखारलांसिगोनखौबो साननानै जेबो बुङाबालासिनो बिजाबखौ बेखेवफिननायसै । नाथाय 5 मिनिटसोनि उनाव ट्रेइनआ खारनो जागायसेयावबो बियो ओंखारमारैयासो आंखौ सोमोनांहोबाय ।     

            : मानो ओंखाराखिसै लिका ? …ट्रेइनआनो खारबाय माथो ।

            : खेबबेसे बुंनांगौ ? आं नोंनि जिजुलिसो होनबायना…। आं नोंजों थांफागोन । आरो नोंनि जिउनि लोगोरि जाहैगोन ।

            : माने !….

            : आं नोंखौ मोजां मोनो आरो नोंजोंनो हाबा जागोन । बेखौ नोंबो ना खालामनो हानाय नङा ।

            : थारै नों मा सानमारदों लिका ?

            : औ.. आं आफानोबो बुंहरखाबाय । बे खोथाखौदि नोंबो मिथिया बेखौबो बुंहरदों आफानो । आरो आंनि थांखि नोङोदि जाफुंहोगोन बेखौ आं मिथिखागौ । नोंहाबोदि रावबो गैखाया बेखायनो आं नोंखौनो सान्दों ।

            : नाथाय…

            : साननांगौ जेबो गैया, जिंगा दासि । ओमफ्राय ट्रेइननि टिकेटआ साबेसेनि नों थाल लाफेरदों ?

            : होम…सानैनि माथो…आं टिकेतखौ सानैनि नुबावनानै सोमो नांदों । माने टिकेतखौ आं बिखौनो दानहोहरदोंमोन दिनैनि दानमोनसे आगोलाव ।

            आरो बियो गोबां बाथ्रा बुंदोंमोन । बियो आंखौ जेरै स्तेशनसिम दोनबोनायनि खोथा बुंदों थिग बिब्दिनो बिफानोबो बिब्दिनो खिन्थाबोदों । बिफायाबो फोथायदोंमोनदि लिकाया गावनि गारिखौनो स्तेशनसिम लाबोदों । नाथाय लिकानि साननाया गुबुन । बियो गारिखौ स्तेशननिनो एसे सायेटाव लाखिनानै साबि आरो गारिखौ बे स्तेशनआवनो साखरि मावनाय बिबथै दलेननो गथायो । साबिखौ बिफानो होनांगौ । गाव मोनसे खामानियाव थांगोन, दिनै सफैस्लाबनाय नङा । बिबथैखौबो थगायदों । गासै सैथो खोथा गाव फैनायनि खौरांखौ बिफानो दहाय ट्रेइन सायाव गाखोहांनाय समाव आंखौ नागारनानै बाहेराव ओंखारलांनाय समावनो बियो खोन्थाहरदों । बिफायाबो हायाखिसै बिखौ होबथानो । बियो बिब्दिनो खालामगोन आंबोसो जेबो उदिसखौनो मोनाखैमोन ।

            गंसे गिदिर सिनि दारिमिन । बे दारिमिना सासे बिगोमानिनो । बिगोमानि मुङा प्रभिन । प्रभिन होनब्ला सिनायै गैद्रायलियाबो बुंजागोन । बांसिनै बिनि दारिमिनावनो गोबां सुबुङानो खामानि मावनानै जिउ फोथांगासिनो दङ । बि प्रभिनहाबो दङ फिसाजो सानै आरो फिसाज्ला सासे । बिसिजों गासै नखर साबा जायो । साबाजोंनो नखरा ग्रोम-ग्रोमथार । बेयो मुम्बाई महाराशट्रनि चुनाभाट्टीआव ।

            सानसे अक्टबर दान जोबहांहांनि सममोन । अखाया एसे रे-रे हाफ्लेबाय थानाय बोथोरमोन । बेयो बे दाननिनो जोबथि बुधबारमोन । बेयो प्रभिन मोनहानि सिथ्लायावनोमोन । दिनै प्रभिननिनो देरसिन फिसाजोनि गिबि आस्थाम गानहोनाय हाबा दङ । हौवा गोदाना गवानि । बिहाबो दङ सानाया मुंनि गंसे फायेब स्तार हतेल । बिबादि सासे रांनि बिगोमाखौनो बिजामादै लिंनो मोनसिगोननि प्रभिननि गोसोआ खोथा होलायखालिनिफ्रायनो खुसिजोंनो बिनि फायलिनै गुसुथियाव मिनिस्लुनाय । बियोल’ नङा, नखरनि आरो जाथि-खुरमानि गासैबो मानसिफोरानो खुसि । सोरबायासो बुंलायलायो नखराबो धोनिखायनो फिसाजोआबो धोनि नखरावनो गोग्लैहैसिगोन । बिब्दिनो खोथा बाथ्रानि गेजेरजोंनो फैयै-फैयै दिनै गिबि आस्थाम गानहोनाय हाबा । हौवा लागोआबो सम होखानाय बादियैनो सफैयो । हिन्जाव लागोआ लामानिफ्राय बरायनानै लाबोयो । हौवा गोदाना गुफुरै गोजौयै दाद जांगिला । खावलायजों सोमब्रोम-सोमब्रोमै साबदारि, मेगनाव थें-देबा लानाय, आखाइयाव घरि आरो कट लंपेन, जुथा गानलायलायनायजों इनायनो नायनो मोजां । हजों बिगुमै जानायफोरा बिखौनो सावगारि खेबखुमा खेबखुमा हिन्जाव गोदाननो दिन्थियै दिन्थियै बिब’खौ जंखायहैबाय थादों । बिब’आबोसो जंखायजायैनो खुसियानो जेथो नांलायदों । फायलिनै गुसुथियाल’ रायदावफिन्दों मिनिहालेयै ।

            आस्थाम गानहोनाय हाबाफारिया जाथारनोसै । खमैबो बा मिनिटसोल’सो दंबावो ।  थिख बे समावनो हौवा गोदान लागोखौ फज’नाय खथाथिजाय दावराव जानायखौ हिन्जाव गोदानाबो गावनि खथानिफ्रायनो खोनाहरदों । बियो दावराव जानाय फारसे इन्जुराव खोमाखौ फोनांजाबनानै खोनासंनो नाजायो । खोनामोननानै बियो रुखु रुखु गाबनो हमो । गावनिनो उन्दुग्रा एमआव खुग्लुबसोनानै गाबो । बिनि बिमायाबो हाबबोनानै बिजों हांमा सुरफाफैयो । बिनि जुलिया फेलें । मानोना हौवा गोदाननो होनो गोनां जोथोबखौ नांगौबादियै होनो हायाखिसै । जोथोबनि खोथाया दिनैनि आवगायावनो हौवा लागोआ बुंहरखानायमोन । हौवा लागोनो नांगौ जायखि जाया नोगोर मोखाङावनो मोनसे जायगायावनो जि बिघा हा । खोथाखौ गनायदोंमोन बिफा प्रभिनाबो । नाथाय आथिखालनि समाव नोगोर मोखाङाव जि बिघा हा नागिरनानै मोननाया गोरलै बाथ्रा नङा । खोथायानो जाम्बा मानसिया मानसिनि बिदै नागिरनायजोंसो समान जागोन । बेबो थायसे जायगायावनो । नागिरसेयावबो मोनैखायनो जि बिघा हानि सोलायै जि बिघा हानि समान रांखौनो जोथोब महरै हरगोनखौ सान्दोंमोन । आस्थाम गानहोनायनि खोथाबो होखाबाय जेराव फिसाजोनि इयुनखौ नायहरनानै रांखौनो हरनो थि खालामदोंमोन । नाथाय हौवा लागोआ गनायखिसै । जाहोनाव आस्थाम गानहोनायनि हाबाखौबो फेलें खालामनायसै । आय’ सन्द्रलिका ! …

            बिनि बाथ्राफोरा आंखौ सोगाबालासिनो थायाखै । खामग्लिदों बिखा दोहो दोहोयै बिनि जिउ गोनां बै सानखालिनि बाथ्राखौ सानहरफ्लांनानै । बियो गावनि जिउ गोनां गोजाम सल’फोरखौ खोन्थायै-खोन्थायै दुखुजोंनो मेंग्लिजोबदों आरो बियो बै खोथाखौनो सानहरफिनानै बे समाव बिनि देहाया लोरबां । आं बिखौ उन्दुहोबाय । अबोलासिमबो ट्रेइनआ फेम्फा होयै-होयै खारगासिनोमोन ।

            औ लिकाया गावनो बुंदों, बियो धोनि नखरखौ मुगैनाय मोनसै । धोनि नखरखौ धोन खुबेर होननानैबो बुंसै । जाहोनाव बियो आंबादि नेहाद गावस्रानि सिनि दारिमिनावनो खामानि मावहैनाय सेंग्राखौनोदि अरायनि थाखै सानखुमागासिनो दङमोन । ओंखायनोथ’ आं फैजेननायनि दानमोनसेनिफ्रायनो बियो आंनि सोमोन्दै मोन्थिनो हांखुरै खुनले खुनले आंखौ बुंनो खावलायबाय थादोंमोन । आंनि नखरनि सोमोन्दै आरो आंनि गोसो थोनाय सिख्ला दंनाय दङैनि सोमोन्दै मोन्थिनो हांंखुरैनोथ’ आंखौ Marine Drive आव बेरायनो लांलायदोंमोन । लिकानिनो बै जिउ गोनां गोजाम समफोरनि थाखायनोथ’ बिफा प्रभिनाबो जानांगौ दहाय जेबो  गोरा खोथा बुंहरनो हायाखिसै । आंबोलाय फरायद्रायै नङा । HS खौ फोजोबनानै राहा मोनैयाव लिका मोनहानि दारिमिनावमोन ।

            सन्द्रलिकाया गोदो गोदो उन्दुलांबाय । बिनिनो मिसिबनाय थायनै मेगन, बिनि जारौ खावलाय, बिनि नारें-सु गन्थं, बिनि फायलिनै खोमा आरो बिनि जारोमरोमै जोंखांनाय रैदुब गुसुथियाव आंनि जिजुलिखौ आं नुयो । बिनि खावलायजों जग्लायबोनाय गुसेंग्रा लान्जायबादि दोंनैसो खानाइदोंआवबो आंनि जिजुलिखौ आं नुयो । बिबो जिजुलिबादिनो बिखा फान्दां, जान्जि सेरे, थालिद फस्लाबादि बेदां-बेदां आदै आरोथ’ गोदोना फंले, खानाइ रुमबां । अखाफोर बादि गावदां । नाथाय जिजुलिबादि राव रायज्लायनो रोङा । जिजुलिबादि मोसानोबो रोङा । मानोना सन्द्रलिकाया माराथि सिख्लासो । नाथाय सन्द्रलिकाया जिजुलिबादि अगियान गोसोनि नङा । बियो मुगैनाय होननायखौबो सुखुआ । जाहोनाव दिनै आंनि जिजुलि जानानै फैदों । आं बिखौ बरायनो गिनाय मोन्दोंमोनब्लाबो बिखौ जै होनोनो जिउजोंनो बरायबाय । जिजुलिखौ आं मोनफिनबाय ।

            दंमोन आंहाबो गोसोथोनाय, मोजां मोननाय आंबादिनो बर’ सुबुं, अनजालि सिख्ला । जायखौ आं जिउजोंनो अनोमोन । गुबुनफोरनिबादि बोसोर-बोसोर जुगे-जुगे जायाखैमोनब्लाबो हाबथा खननैयावनो आं बिखौ गुबुनफोरनि बां-बोसोर आरो बां-जुगेनिख्रुइबो बांसिनै मोजां मोन्दोंमोन, गोसो थोदोंमोन । नाथाय बियोसो बुजियासै जेबो । होआसै बेसेन, हाबथा खुननैयावनो मोन्थिया बियोदि मानो गुबुनजों बारस्लायलांखो । थालांबायल’ अननाइजों गाबज्रिनाय बिनिनो मुं सुनानै होनाय दागो, जिजुलि । जायखौ सन्द्रलिकाया गोबानानै लाबाय । बेनि थाखाय आं लिकानो जिउखौबो होनो राजिसै ।

            : जों बबेसिम सफैखो जान…

            : सोनाब बिहार बारबाय सना । नों जोबोर खस्थ’ मोनबाय सना ।

           : नों मानो बिदि बुङो जान….

            : औ सना…, आगोलावनो नों फैफागोनखौ बुंखानायमोनब्ला अख्रां जाहाजजोंनो फैगौमोन । गिलुं गिलुंब्लाबो…

           : जेबो नङा जान…, बियो गावनि खर’खौ आंनि फाफेलाव फज’यो । बिनिनो बिरखारनाय दोंनैसो खानाइदोङा आंनि मोखांखौ हुब्लिरफैयो । लिकाखौ लानानै सिमां राइजोआव आं गेलेहैयो । अखाफोर गानाय जोमैनि आमोलाव सिगांग्रो जुलि लाहैयो । सिखिरि गाङाव बाथाबनानै हाथरखि नायहैयो । सांग्रेमाफोराबोसो बरायसै गावसोरनि जोंथि लुचिफेरिनखौ फोजोङै फोजोङै लिका आरो आंनि गोथार जुलियाव । मिथाइयारिफोरासो खुदै गसै । थांनायनि फैनायनि मिथाइ जासिफैयै जासिफैयै नुबिलिफोरा गोजामखासै ।

            बे समाव जों आसामनि हादाबाव । दाहाय मोनानि 10 रिंगायाव रङिया झंशन सहैनोसै । आसामनि हादाबावखायनो सुथुरफोरनि फुवानाबो रेगाहांबाय । ओंखायनो लिकाखौनो उन्दुहोबावनोसै आं । थांनाय हरावबो बिहा जोबोरैनो मेगन मोदै जादों । सहैजासिम ‘अस्तिर प्रान्तर’ बिजाबखौनो फरायनोसै आं । आद्रा जानानै दङ ।

            दासान्दै आसामनि थासारिफोरा जोबोर गुदुं । मानसिजों मानसि आरो हारिजों हारि नेरलायलायनाय । जेन राव रोङै आखल-आखु रोङै अरन गेजेरनि जुनारसै मानसि माहारिया । अनज्लायनाय बुजिलायनाय होननायानो गोथैबारियावसै । हयथ’ फरायगिरि नोंथाङा गोदानब्ला मिथिनानै लानाया गाहाम । बर’आ आलादा राइजो बड’लेण्डनि मुङै होस्रिख्रावबोनाय, जोनोमनि मोन्थाय मोननांगौनि थांखियै सम बारहोहरनाया गोदान खोथा नंलिया होननानै हयथ’ नोंथाङा बेखिनिखौ मोन्थिखायो । गोजौनिफोराबो गाबोन रायज्लायगोन, समफोर राज्लायगोन आरो मोन्थिया माब्ला रायज्लायगोन बर’नि जेंना सुस्रांगोननि बाथ्रा । होमब्ला बिब्दियैलाय बेसेबांथो गादब जाबाय थानो आरो जिगाब बुन्थानि फुथुलाबादि मोसाहोजाबाय थाबावनो । सहायहायाखै बर’नि गोबां सुबुंफोर । ओंखायनो बर’निनो दैदेनगिरि बिथांमोना गोख्रों बिग्रायखांनाय सोस’ननानै होफैबाय । जाहोनाव दिनै आसामाव गोबां दावराव दावसि । खना-खनला हास्रि-हुस्रियै बेरायजाया । दिनैनि सिगांनि बाथ्रा बड’लेण्ड मोननांगौनि दाबिजों आसामाव दानमोनथाम ट्रेइन खारहोआखै । खारहोयैआव आसामा गोबां खहा जादों । खहानि थाखायनो बर’नि हेंथायै बर’ नङैफोरा बां-दावराव खालामफिनो । नाथाय बर’फोराबो जेननानै थायाखैमोन । बिब्दियैनो आसामाव दान मोन्थाम ट्रेइन खाराखैमोन । बेनि होबथानायासो जोबनानै थांबाय । नाथाय दिनैसिमबो बड’लेण्डनि जेबो खौरां गैया । रेगा महरै दावराव दावसियासो जोंनानै थाबाय गोजों हिराफोरबादि । जाहोनाव गोजानाव खामानि मावहैनायफोरासो न’फारसे फैनोनो हाबांला । फैयोब्लाबो आसामावसो गिनांगौ । आसाम सरकारखौ जेरै खहा खालामदोंमोन बिदिनो गुवाहाटियावबो बर’फोरखौ थाहोला । हास्रि हुस्रि नुयोबोला बुथारखोमानाय । बहाबा दोनखारनानै बान्दा खालामहैनाय । बेनि थाखायनो सैज्यो हायैयाव बर’फोरा गावजों गावबो दावराव दावसि । जाहोनाव आंबो अख्रां जाहासजों फैनो नागारै ट्रेइनजोंसो फैनांबाय । मानोना गोजौजों फैयोबोला गुवाहाटिसिम थांखाथारनांगोन । बिदि दावराव दावसि समाव आंलाय माबोरै थांलायखो ? दाखालि बर’नि खौरांगिरिफोरनिफ्राय खौरां मोननाय बादिब्ला बड’लेण्डनि जेंनाया सुस्रांजासिगोन होननायबादिबो खोनाज्रिददों । थारैनो मोनमारोब्ला बर’फोरा मेंगासिगोन ।

            जों रङिया झंशन मोन्थारनोसै । बेखायनो ओंखारनो थियारि जाखाबाय । जों ओंखारख्लायबाय । हजों न’निफ्राय गारि थिनहरखानाय लेखायै गारि फैसान्दि झंशनावनो बनानै दोननाय मासियाव जिरायग्लांबाय । बे समाव साब्रैसो अस’मिया मानसिफोरा जोंनि सेरजों आवगायबोदोंमोन । बिसोर जोंखौ नायबिजिरदोंमोन । नाथाय बिसोर दसे उनाव जेबो बुङा बालासिनो दिंग्रायलांफिनो । हयथ’ जोंखौ बर’ सानाखिसैखोमा । मानोना लिकायाबोदि माराथि सिख्लासो जाहैबाय । हजों आंनि आखाइयावबो गांसे अस’मिया लेखाखौ नुबावबाय। जायखौ आं ट्रेइन सायाव फरायबोबाय थाबोदों । अबोलानि समाव जोंखौ लांनो फैनाय गारियाबो सफैबायमोन । गारिसिम थांनानै गोबाव खालामालासे गाखोबाय । गारिया खारफिनबाय । गारि सालायग्राजोंनो फैफानाय अलंबारा गारि सिङावनो सोंदोंमोन-

            : नोंजों फैफानाय लोगोखौ सेग्रासो सान्दोंमोन आं दैमारि….

            : हे हे हे….

            : ओमफ्राय सोर ?

            : जिजुलिया बिनो…

            : मोन….? जिजुलिया बर’सो नङामोन होनलाय…

           : बर’मोन नाथाय बर’ सिख्लाया बहा जोरनोदे बे ट्राक बोरायबादि दैमारिनाव…

            : होम्बाथ’ गोदान जिजुलिनि पार्ति मोन्जासिगोनलै…

            : हे हे हे… मोनजागोनरा…। जों गासिबो मिनिज्लायो, खुसिजोंनो जोंनि गारिया गामि होननानै गोबारसिनै खारनो हमो । अबोला हरनि 11 रिंगाबायमोन । आंबो ट्रेइन सायाव फरायबोनाय इमरान हुसेइननि ‘अस्तिर प्रान्तर’ बिजाबखौ बेगाव सोफिननानै लाबाय । ◈◈◈

    Published:

    Follow TIME8.IN on TWITTER, INSTAGRAM, FACEBOOK and on YOUTUBE to stay in the know with what’s happening in the world around you – in real time

    First published

    ट्रेन्दिं

    प्रमद बर’आ ट्रेक्टर कम्पानिनि एजेन्ट : चन्दन ब्रह्म

    बिटिसि बिसाइख'थिनि मुङाव रां लानानै ट्रेक्टरनि इडभारटाइजसो खालामबाय थादों

    गावबुरानि गोसो थोनायाव बोदोर जानानै खारस’न फैदों सासे सिख्ला

    रुपहि कलेजनि फरायसुलिआ थांनाय 3 बोसोरनिफ्राय धिं जेङनिनि गावबुरा इक्रामुल हुसेइनजों मोजां म